«Кĕнеке — пĕлӳ çăлкуçĕ». Ахальтен мар ĕнтĕ каланă çак сăмахсене Петĕр Хусанкай. Шкулсенче вара кĕнекесĕр пĕлĕве тарăнăн тĕпчеме май çук.
Пĕтĕмĕшле пĕлĕве модернезацилес тĕллевпе йышăннă ятарлă программăпа килешӳллĕн федераллă хыснинчен уйăрнă укçа-тенкĕпе Шăмăршă районĕн шкулĕсене 2013–2014 вĕренӳ çулĕ валли туяннă шкул кĕнекисемпе тивĕçтереççĕ. Ку лару-тăру вара 1–4 тата 9–11 класс ачисене шкул кĕнекисене укçалла туянассинчен хăтарать. 5–8 класра вĕренекенсен те кĕнекесем çине тăкакланмалла мар пулĕ, вĕсем валли вĕренӳ литературине республика тата вырăнти хыснаран уйăрнă укçапа туянма палăртнă.
Паянхи куна Шăмăршă районĕн вĕренӳ пайĕ тата çамрăксен политикин администрацийĕ 1–4 тата 9–11 класс ачисем валли пайăмлă учебниксен пуххи çитнĕ — 2 602 яхăн экземпляр, вĕсен пĕтĕмĕшле суммми — 424 764 тенкĕ.
Район администрацине килнĕ кĕнекесем шкулсене вĕренӳ учрежденийĕ панă заявкăсем тăрăх валеçĕнет.